“Ижтимоий фикр. Инсон ҳуқуқлари” илмий журнали тарих, ҳуқуқ, санъатшунослик, социология, фалсафа ва сиёсат фанлари йўналишларида илмий тадқиқот олиб бораётган муаллифларни ҳамкорликка таклиф этади. ОАК эътироф этган ушбу нашрнинг 2026 йил 1-сони учун мақолалар қабул қилинмоқда. Янги сон жамият тараққиёти, инсон ҳуқуқлари, ижтимоий адолат, ҳуқуқий онг, сиёсий ва маданий жараёнларнинг назарий ҳамда амалий жиҳатларини чуқур илмий таҳлил қилишга қаратилган тадқиқотларни қамраб олади.

Журнал илмий изланишларда аниқ методологик ёндашув, ишончли манбаларга таяниш ва мантиқий хулосалар чиқаришни устувор мезон сифатида белгилайди. Муаллифлардан тадқиқот мавзусини миллий ва халқаро илмий контекстда ёритиш, мавжуд илмий қарашларни танқидий таҳлил қилиш ҳамда фан ривожига хизмат қилувчи илмий янгиликларни илгари суриш талаб этилади. Илмий публицистик руҳда ёзилган, кенг жамоатчиликка равшан баён этилган ва академик талабларга қатъий мувофиқ келадиган мақолаларга устувор аҳамият берилади.

Журнал таҳрир ҳайъати, давлат ва нодавлат ташкилотлари ходимлари, олий таълим муассасалари профессор-ўқитувчилари, олимлар ҳамда илмий изланувчиларнинг илмий мақолалари қабул қилинади. Тақдим этилган илмий ишлар таҳрир ҳайъати томонидан белгиланган илмий мезонлар асосида саралаб чиқилади ва талабларга тўлиқ жавоб берган мақолалар журналнинг 2026 йил 1-сонида нашр этилади.

Мақолаларни қабул қилиш муддати 15 февралга қадар давом этади. Илмий натижаларингизни ОАК эътироф этган нашрда эълон қилиш орқали тадқиқотингиз илмий жамоатчилик ва жамоатчилик онги ривожига қўшаётган ҳиссасини намоён этиш имконияти яратилади.