“Ижтимоий фикр” республика жамоатчилик фикрини ўрганиш маркази мамлакатда социологик тадқиқотлар сифатини оширишга қаратилган тизимли ишларни изчил давом эттирмоқда. Шу мақсадда интервьюерлик фаолияти учун малакали кадрлар тайёрлаш йўналишида ўқув-тренинг дастурлари мунтазам ташкил этилмоқда.

Жорий йилнинг 17–18 март кунлари Марказда интервьюерликка номзодлар учун навбатдаги амалий ўқув-тренинг машғулотлари бўлиб ўтди. Машғулотлар Марказнинг амалий тадқиқотларни ташкил этиш ва ўтказиш бўлими мутахассислари томонидан олиб борилиб, сўров жараёнларини ташкил этишнинг илмий-методик асослари чуқур ва тизимли равишда ёритилди.

Ҳар бир саволноманинг мазмун-моҳияти атрофлича таҳлил қилиниб, саволларнинг тўғри интерпретацияси, респондент билан мулоқотда аниқлик ва нейтралликни сақлаш, маълумотларни холис ва ишончли йиғиш каби муҳим жиҳатларга алоҳида урғу берилди. Иштирокчилар амалиётга йўналтирилган ёндашув асосида реал интервью сценарийлари орқали ўз кўникмаларини мустаҳкамладилар.

Мазкур тренинглар нафақат назарий билимларни бойитиш, балки интервьюернинг касбий идентификациясини шакллантириш, унинг масъулият ҳиссини кучайтириш ва ахлоқий стандартларга қатъий амал қилишини таъминлаш нуқтаи назаридан ҳам муҳим аҳамият касб этди. Чунки жамоатчилик фикрини ўрганиш жараёнида ҳар бир интервьюернинг профессионал ёндашуви тадқиқот натижаларининг ишончлилигига бевосита таъсир кўрсатади.

Ушбу ўқув дастурлари орқали тайёрланаётган интервьюерлар келгусида социологик тадқиқотларни юқори сифат даражасида амалга ошириш, аҳоли фикрини холис ва аниқ акс эттириш, шу орқали эса жамоатчилик фикрига таянилган қарорлар қабул қилиш жараёнига муносиб ҳисса қўшиш имкониятига эга бўладилар.