МИНСК ШАҲРИДА “СОЦИОЛОГИЯ ВА ЗАМОНАВИЙ ЖАМИЯТ” МАВЗУСИДА ХАЛҚАРО ДАВРА СУҲБАТИ БЎЛИБ ЎТДИ

Жорий йилнинг 20 февраль куни Минск шаҳрида Беларус Миллий Фанлар Академияси Социология институтининг 35 йиллик юбилейига бағишланган “СОЦИОЛОГИЯ ВА ЗАМОНАВИЙ ЖАМИЯТ” мавзусида халқаро давра суҳбати ўтказилди. Ушбу тадбир миллий ва халқаро социология ҳамжамияти учун муҳим илмий-амалий аҳамият касб этди, чунки унда ижтимоий муаммоларни ҳал этишда социологик ёндашувларнинг аҳамияти шунингдек мазкур фаннинг ривожланиш истиқболлари кенг муҳокама қилинди.

Беларусь Миллий Фанлар Академияси Социология институтининг илмий нашрлари кўргазмаси билан бошланди. Бу ерда институтнинг ўтган йиллар давомида эришган илмий ютуқлари, уларнинг халқаро ҳамжамият учун аҳамияти ва келгусидаги тадқиқот йўналишлари намойиш этилди. Ушбу кўргазма тадбир иштирокчиларига институтнинг турли мавзулардаги илмий ишлари ва уларнинг натижаларини кўриш имкониятини берди.

Давра суҳбатини Беларус Миллий Фанлар Академияси Социология институти директори, социология фанлари номзоди, доцент, Мысливец Николай Леонтьевич очиб берди.

Давра суҳбати икки сессиядан иборат бўлди:

Биринчи сессия: "Беларусь Миллий Фанлар Академияси Социология институти: тарихи, ютуқлари, ривожланиш истиқболлари" мавзусида ўтказилди. Унда институтнинг ташкил топиш тарихи, илк тадқиқотлари, асосий ютуқлари ва бугунги кундаги ўрни ҳақида маърузалар тингланди. Иштирокчилар институтнинг ўтган йиллар давомида социология фанининг турли соҳаларидаги амалий ишланмалари, хусусан жамоатчилик фикрини ўрганиш, ижтимоий муаммоларни ҳал этиш ва ижтимоий сиёсатни шакллантиришдаги ҳиссасини алоҳида таъкидладилар.

Мазкур сессияда, Ижтимоий фикр Республика жамоатчилик фикрини ўрганиш маркази директорининг биринчи ўринбосари Хаджимухамедов Марат Каримович «Ўзбекистонда амалий социологик тадқиқотлар» номли маърузаси билан қатнашиб, жамоатчилик фикрини ўрганишнинг янги услублари ва уларнинг социологик тадқиқотлардаги аҳамияти ҳақида сўз юритди.

Шунингдек, Ижтимоий фикр Республика жамоатчилик фикрини ўрганиш маркази ҳамда Беларусь Миллий Фанлар Академияси Социология институти билан ўзаро илмий ҳамкорлик ҳақида шартнома имзоланди.

Давра суҳбати ўз мазмунли муҳокамалари, илмий мулоқотлар ва келажакка йўналтирилган истиқболли таклифлари билан барча иштирокчиларда катта таассурот қолдирди.