Joriy yilning 28 mart kuni “Ijtimoiy fikr” Respublika jamoatchilik fikrini oʻrganish markazi majlislar zalida Oʻzbekiston Respublikasi Oliy Majlisi Qonunchilik palatasining Demokratik institutlar va fuqarolik jamiyatini rivojlantirish masalalari qoʻmitasi, jamoat tashkilotlari, nodavlat notijorat tashkilotlari, ommaviy axborot vositalari vakillari, ixtisoslashtirilgan oliy taʼlim muassasalarining professor-oʻqituvchilari ishtirokida ilmiy-amaliy seminar boʻlib oʻtdi.

Zamonaviy globallashuv sharoitida jamoatchilik fikrini oʻrganish va shakllantirishga oid ilmiy-amaliy tadqiqotlarning roli tobora ortib bormoqda. Ushbu jarayon, ayniqsa, Oʻzbekiston jamiyatining ijtimoiy-iqtisodiy, madaniy va siyosiy transformatsiyalari sharoitida, dolzarb masala sifatida koʻrib chiqilmoqda. Shu nuqtai nazardan, “Ijtimoiy fikr“ Respublika jamoatchilik fikrini oʻrganish markazi tomonidan tashkil etilgan doimiy ilmiy-amaliy seminar doirasida “Zamonaviy Oʻzbekiston jamiyatida ijtimoiy voqelikning xususiyatlari“ mavzusida navbatdagi davra suhbati oʻtkazildi.

Mazkur davra suhbatini “Ijtimoiy fikr” Respublika jamoatchilik fikrini oʻrganish markazi direktori Raximova Nigina Xayrullayevna qutlov soʻzi bilan ochib berdilar va zamonaviy dunyoda jamoatchilik fikri nafaqat ijtimoiy va siyosiy jarayonlarning oʻlchovchi indikatori, balki islohotlarning samaradorligini baholovchi muhim mezon sifatida namoyon boʻlayotganligini taʼkidladilar va seminar ishiga muvaffaqiyat tiladilar.

Shuningdek, Oʻzbekiston Respublikasi Oliy Majlis Qonunchilik palatasining Demokratik institutlar va fuqarolik jamiyatini rivojlantirish masalalari qoʻmitasi raisi Agzamova Gulrux Anvarovna soʻzga chiqib, — jamoatchilik fikrining ilmiy tahlili asosida tashkil etilayotgan ushbu davra suhbati nafaqat nazariy, balki amaliy ahamiyatga ham ega. Unda bildiriladigan taklif va mulohazalar mamlakatimizda olib borilayotgan islohotlarning mazmun-mohiyatini boyitishga, fuqarolarning ijtimoiy farovonligi va huquqiy ongini yuksaltirishga xizmat qilishi shubhasiz. Ishonamanki, bugungi tadbir ochiq va konstruktiv muloqot, ilmiy fikrlar va amaliy takliflarga boy oʻtadi. Barchangizga muvaffaqiyat va ilhom tilayman.

Bugungi Oʻzbekiston – jadal rivojlanayotgan, islohotlar jarayoni keng koʻlamda amalga oshirilayotgan mamlakatdir. Soʻnggi yillarda Oʻzbekiston hukumati demokratik institutlarni rivojlantirish, fuqarolik jamiyatini mustahkamlash, korrupsiyaga qarshi kurashish va aholining ijtimoiy-iqtisodiy farovonligini oshirish borasida muhim qadamlarni tashlamoqda. Bu jarayonlar, oʻz navbatida, jamoatchilik fikrining shakllanishi va oʻzgarishiga bevosita taʼsir koʻrsatmoqda.

Xususan, Oʻzbekiston Prezidenti Shavkat Mirziyoyev rahbarligida amalga oshirilayotgan “Yangi Oʻzbekiston“ strategiyasi doirasida inson huquqlari, ochiqlik va oshkoralik tamoyillariga asoslangan islohotlar ilgari surilmoqda. Fuqarolarning jamiyat hayotidagi faolligi ortib borayotgan boʻlsa, ijtimoiy tarmoqlar va ommaviy axborot vositalari orqali ochiq muloqot madaniyati shakllanmoqda. Ushbu ijtimoiy va siyosiy oʻzgarishlar jamoatchilik fikrining shakllanishida yangi tendensiyalarni yuzaga keltirmoqda.

Mazkur jarayonlarni ilmiy oʻrganish va tahlil qilish dolzarb ahamiyat kasb etib, “Ijtimoiy fikr” Respublika jamoatchilik fikrini oʻrganish markazi tomonidan olib borilayotgan tadqiqotlar ushbu masalalarni chuqur yoritishga xizmat qiladi.

Seminar doirasida yetakchi ekspertlar tomonidan muhim ilmiy maʼruzalar taqdim etildi va atroflicha muhokama qilindi. Xususan, quyidagi maʼruzalar tinglandi va tahlil qilindi:

Alekseyeva Viktoriya Sergeyevna – “Ijtimoiy fikr” RJFOʻM direktorining birinchi oʻrinbosari, sotsiologiya fanlari boʻyicha falsafa doktori, PhD. “Jamoatchilik fikri – 2022-2024” (oʻtkazilgan sotsiologik tadqiqot natijalari asosida) nomli maʼruza bilan ishtirok etdi.

Seitov Mansur Sherikbayevich – “Ijtimoiy fikr” RJFOʻM direktorining ilmiy ishlar boʻyicha oʻrinbosari, sotsiologiya fanlari boʻyicha falsafa doktori, PhD. – “Korrupsiya va korrupsiyaviy holatlarning jamiyat hayotiga tarqalganlik darajasi jamoatchilik ongida idrok etilishini baholash” nomli maʼruza bilan ishtirok etdi.

Tadjibayev Azizbek Baxodir oʻgʻli – “Ijtimoiy fikr” RJFOʻM tahliliy boʻlim mudiri – “Zamonaviy oila va nikohning barqarorligi masalalarini oʻrganishdagi ayrim tendensiyalar” nomli maʼruzasi bilan ishtirok etdi.

Muratov Timur Raviyevich – “Ijtimoiy fikr” RJFOʻM axborot texnologiyalari va axborot xavfsizligi xizmati rahbari – “Raqamli makondagi tahdidlar va daʼvatlar” nomli maʼruza bilan qatnashdi.

Mazkur seminar doirasida jamoatchilik fikrining shakllanishi va uning ijtimoiy jarayonlarga taʼsirini chuqur ilmiy tahlil qilish bilan birga, zamonaviy sotsiologik tadqiqot uslublari orqali jamiyatning dolzarb muammolarini aniqlash va ularga ilmiy-amaliy yondashuvlar ishlab chiqish muhokama qilindi. Shu bilan birga, seminar doirasida jamiyatdagi ijtimoiy transformatsiyalarni kompleks oʻrganish, jamoatchilik fikri rivojlanishiga taʼsir etuvchi ichki va tashqi omillarni tahlil qilish masalalari ham atroflicha oʻrganildi.

Seminar davomida yetakchi sotsiologlar, siyosatshunoslar, ijtimoiy psixologlar, ommaviy axborot vositalari vakillari hamda fuqarolik jamiyati institutlari mutaxassislari tomonidan dolzarb ilmiy maʼruzalar va tahliliy hisobotlar taqdim etildi. Mazkur ilmiy-amaliy seminar ijtimoiy fanlar sohasidagi yangi ilmiy natijalar bilan tanishish, amaliy tajriba almashish hamda kelajakdagi ilmiy tadqiqotlar uchun mustahkam poydevor yaratish imkoniyatini taqdim etadi.

Seminar yakunida ishtirokchilar tomonidan jamoatchilik fikrini oʻrganishning dolzarb masalalari yuzasidan ilmiy va amaliy fikr-mulohazalar bildirildi. Tadbir davomida muhokama qilingan mavzular boʻyicha takliflar ilgari surildi hamda kelgusida amalga oshirilishi lozim boʻlgan tadqiqot yoʻnalishlari belgilab olindi. Ishtirokchilar Oʻzbekistonda ijtimoiy voqelikni chuqur tahlil qilish, jamoatchilik fikrining shakllanishi va uning jamiyat taraqqiyotiga taʼsirini oʻrganishda zamonaviy ilmiy yondashuvlar muhimligini taʼkidladilar.

Tadbir doirasida soha mutaxassislari va ilmiy-tadqiqot muassasalari oʻrtasida hamkorlikni rivojlantirish, empirik tadqiqotlar samaradorligini oshirish hamda jamiyatning ijtimoiy ehtiyojlariga mos ilmiy tavsiyalar ishlab chiqish yuzasidan kelishib olindi.