Hasanboy Doʻsmatov olimpiada chempioni!

Oʻzbekistonlik bokschi Hasanboy Doʻsmatov Parij-2024 Olimpiadasining oltin medaliga sazovor boʻldi. U Oʻzbekiston tarixida Olimpiya oʻyinlarida ikkita oltin medalga ega chiqqan birinchi bokschi boʻldi.

Hasanboy Doʻsmatov Parijda oʻtkazilayotgan olimpiada oʻyinlarining 1/16 finalida Puerto Riko vakili Xuan Manuel Lopesni 5:0 hisobida magʻlubiyatga uchratgan. Chorak finalda Qozogʻiston vakili Saken Bibossinov bilan toʻqnashib, 3:2 hisobida gʻalaba qozondi. Yarim final bahslarida Kabo Vardelik Daniel Varela de Pina ustidan gʻalaba qozonib final yoʻllanmasini qoʻlga kiritdi. Finalda Fransiya vakili Billal Bennama ustidan gʻalaba qozondi va oltin medalni qoʻlga kiritdi.

Xasanboy Maʼrufjanovich Doʻsmatov 1993 yil 24 iyunda Andijon viloyatida tugʻilgan. 2012 yildan Oʻzbekiston terma jamoasi vakili. Murabbiyi: Ziyatdin Toyganboev. Rio-2016 Olimpiadasida Doʻsmatov 49 kg vazn toifasida chempion boʻlgan, shuningdek, eng yaxshi texnikaga ega bokschiga beriladigan “Vel Barker” kubogini qoʻlga kiritgan.

U, shuningdek, Gamburgdagi 2017 yilgi jahon chempionati finalchisi. 2018 yilgi Osiyo oʻyinlarining kumush medali sohibi. Uch karra Osiyo chempioni (2015, 2017 va 2022). 2023 yilda Toshkentda oʻtkazilgan jahon chempionatida oltin medalni qoʻlga kiritgan va musobaqaning eng yaxshi bokschisi deb topilgan. Xizmatlari uchun “Oʻzbekiston Respublikasida xizmat koʻrsatgan sportchi” va “Oʻzbekiston iftixori” faxriy unvonlari bilan taqdirlangan. Xanchjou-2022 yozgi Osiyo oʻyinlarida -51 kg vazn toifasida oltin medalni qoʻlga kiritgan.

O‘zbekiston delegatsiyasining medallari 5 taga yetdi. Avvalroq dzyudo bo‘yicha Diyorа Keldiyorova oltin, taekvando bo‘yicha Ulug‘bek Rashitov oltin, dzyudo yo‘nalishida Muzaffarbek To‘raboyev va Alisher Yusupov bronza medaliga sazovor bo‘lgandi.

“Ijtimoiy fikr” respublika jamoatchilik fikrini oʻrganish markazi barcha yurtdoshlarimizni hamda “Oʻzbekiston Respublikasida xizmat koʻrsatgan sportchi” va “Oʻzbekiston iftixori” Hasanboy Doʻsmatovni ushbu yorqin gʻalaba bilan muborak etadi. Omad yor boʻlsin Hasanboy!