30 IYUL - XALQARO DO'STLIK KUNI!

Har yili 30 iyul sanasi xalqaro miqyosda xalqaro do'stlik kuni sifatida keng nishonlanadi. Ushbu sana Birlashgan Millatlar tashkiloti Bosh Assambleyasining 2011 yil 27 aprelda qabul qilingan rezolyusiyasiga muvofiq ta'sis etilgan bo'lib, xalqlar, Millatlar va madaniyatlar o'rtasidagi o'zaro ishonchni mustahkamlash, tinchlik va hamjihatlikni qaror toptirish, bag'rikenglik va o'zaro hurmat tamoyillarini keng targ'ib etishga qaratilgan.

Bugungi globallashuv sharoitida millatlararo hamjihatlik va do'stlik munosabatlarini mustahkamlash barqaror taraqqiyotning muhim omillaridan biri hisoblanadi. Turli millat, elat va diniy e'tiqod vakillarining o'zaro hurmat, tenglik va hamkorlik asosida yashashi jamiyatda ijtimoiy barqarorlikni ta'minlash, fuqarolik birdamligini kuchaytirish hamda inson huquqlarini ro'yobga chiqarishning muhim shartidir.

BMT tomonidan ta'sis etilgan ushbu xalqaro sana do'stlik tushunchasini nafaqat insonlar o'rtasidagi munosabatlar, balki davlatlar, xalqlar va madaniyatlar o'rtasidagi hamkorlikni mustahkamlovchi umuminsoniy qadriyat sifatida e'tirof etadi. Shu ma'noda, o'zaro ishonch, bag'rikenglik, muloqot madaniyati va hamjihatlikni rivojlantirish orqali nizolarning oldini olish, ijtimoiy kelishuvni ta'minlash hamda tinchlik madaniyatini qaror toptirish ushbu kunning asosiy maqsadlarini tashkil etadi.

O'zbekiston azaldan turli millat va elat vakillari tinch-totuv yashab kelayotgan, millatlararo totuvlik va diniy bag'rikenglik davlat siyosatining ustuvor yo'nalishlaridan biri sifatida qaror topgan mamlakatdir. Bugungi kunda mamlakatimizda yuzdan ortiq millat va elat vakillari hamda turli diniy konfessiyalar vakillari yagona Vatan ravnaqi yo'lida hamjihatlik va o'zaro hurmat muhitida hayot kechirmoqda. Bu esa yangi O'zbekiston taraqqiyotining muhim ijtimoiy tayanchlaridan biri hisoblanadi.

"Ijtimoiy fikr" Respublika jamoatchilik fikrini o'rganish markazi mamlakatimizda millatlararo munosabatlar, ijtimoiy hamjihatlik, fuqarolik birdamligi, bag'rikenglik, milliy qadriyatlar, jamoatchilik ishonchi va ijtimoiy barqarorlik masalalarini muntazam sosiologik tadqiq etib kelmoqda. Markaz tomonidan amalga oshirilayotgan respublika miqyosidagi ijtimoiy so'rovlar orqali aholining millatlararo munosabatlarga bergan bahosi, turli ijtimoiy guruhlar o'rtasidagi o'zaro ishonch darajasi, bag'rikenglik muhiti, jamiyatdagi ijtimoiy birdamlik hamda fuqarolik hamjihatligini mustahkamlovchi omillar chuqur tahlil qilinmoqda.

O'tkazilayotgan tadqiqotlar natijalari mamlakatda ijtimoiy barqarorlikni ta'minlash, millatlararo totuvlikni yanada mustahkamlash, aholining ijtimoiy kayfiyatini baholash, davlat va jamiyat o'rtasidagi ishonchni kuchaytirish hamda insonparvarlik tamoyillariga asoslangan ijtimoiy siyosatni takomillashtirishda muhim ilmiy-amaliy ahamiyat kasb etmoqda.

Xalqaro do'stlik kuni insonlarni birlashtiradigan ezgu qadriyatlar — o'zaro hurmat, ishonch, bag'rikenglik va hamjihatlikni yanada mustahkamlashga xizmat qiladi. Millatlararo totuvlik va ijtimoiy birdamlikni asrash, fuqarolik jamiyati institutlari, davlat tashkilotlari va keng jamoatchilikning hamkorligini rivojlantirish, shuningdek, jamoatchilik fikrini muntazam o'rganish orqali jamiyatda tinchlik va barqaror taraqqiyotni ta'minlash bugungi kunning dolzarb vazifalaridan biri bo'lib qolmoqda.