2025-yil 29-iyul kuni Toshkent shahridagi Oʻzbekiston Respublikasi Oliy Majlisi Senati binosida “30-iyul — Butunjahon odam savdosiga qarshi kurashish kuni” munosabati bilan “Odam savdosiga qarshi kurashda global chaqiriqlar: jamiyatning roli va xalqaro hamkorlik” mavzusida xalqaro konferensiya boʻlib oʻtdi.

Mazkur nufuzli anjuman Odam savdosiga qarshi kurashish va munosib mehnat masalalari boʻyicha Milliy komissiya tashabbusi bilan, Ichki ishlar vazirligi, Xalqaro migratsiya tashkiloti, BMT, YEXHT va bir qator mahalliy va xalqaro hamkor tashkilotlar ishtirokida tashkil etildi.

Tadbirda odam savdosining zamonaviy tahdidlari, jamiyatning bundagi oʻrni, inson huquqlarini himoya qilish, profilaktik chora-tadbirlarni kuchaytirish va xalqaro hamkorlikni rivojlantirish kabi masalalar atroflicha muhokama etildi.

Konferensiyada “Ijtimoiy fikr” respublika jamoatchilik fikrini oʻrganish markazi direktori Raximova Nigina Xayrullayevna faol ishtirok etdi. U oʻz maʼruzasida jamiyatda odam savdosiga nisbatan munosabat, uning ijtimoiy-ruhiy ildizlari, xavf guruhlarini aniqlash va fuqarolar ongini shakllantirishda jamoatchilik fikrini oʻrganish muhimligini alohida taʼkidladi.

Shuningdek, Markazi direktori Nigina Xayrullayevna “Ijtimoiy fikr” Markazi tomonidan oʻtkazilgan soʻrovlar va tahlillar natijalariga tayanib, odam savdosiga qarshi kurashda ijtimoiy fikrning oʻrni va taʼsiri haqida ilmiy-amaliy takliflarni bayon etdi.

Konferensiya yakunida davlat idoralari, fuqarolik jamiyati institutlari va xalqaro tashkilotlar oʻrtasidagi hamkorlikni mustahkamlash boʻyicha qator amaliy tavsiyalar qabul qilindi.