YANGI ENERGETIK DAVR SARI: OʻZBEKISTONDA ATOM ENERGETIKASI SOHASIDA STRATEGIK LOYIHAGA START BERILDI

Oʻzbekiston energetika tizimini modernizatsiya qilish, iqtisodiyotning oʻsib borayotgan ehtiyojlarini taʼminlash va uzoq muddatli energetik barqarorlikka erishish yoʻlida yana bir muhim qadam qoʻyildi. Davlatimiz rahbari Shavkat Mirziyoyev hamda Rossiya Federatsiyasi Prezidenti Vladimir Putin ishtirokida mamlakatimizda integratsiyalashgan atom elektr stansiyasining birinchi energiya blokini qurish ishlariga rasman start berildi.

Mazkur voqea nafaqat energetika sohasi, balki milliy iqtisodiyot, sanoat taraqqiyoti, texnologik yangilanish va mamlakatning investitsiyaviy jozibadorligini oshirish nuqtai nazaridan ham muhim ahamiyat kasb etadi. Soʻnggi yillarda mamlakatimizda amalga oshirilayotgan keng koʻlamli iqtisodiy islohotlar, sanoat hajmlarining oʻsishi, urbanizatsiya jarayonlarining faollashuvi hamda aholi farovonligini oshirishga qaratilgan chora-tadbirlar energiya resurslariga boʻlgan talabni tobora kuchaytirmoqda. Bunday sharoitda barqaror, ishonchli va ekologik jihatdan maqbul energiya manbalarini shakllantirish davlat siyosatining ustuvor yoʻnalishlaridan biri sifatida namoyon boʻlmoqda.

Atom energetikasi bugungi kunda koʻplab rivojlangan davlatlarda energetik xavfsizlikni taʼminlashning muhim vositasi sifatida qaralmoqda. U yuqori hajmda elektr energiyasi ishlab chiqarish imkoniyati, uzoq muddatli samaradorligi va atmosferaga chiqariladigan zararli chiqindilarning nisbatan kamligi bilan ajralib turadi. Shu maʼnoda, mamlakatimizda integratsiyalashgan atom elektr stansiyasi qurilishining boshlanishi Oʻzbekistonning zamonaviy texnologiyalarga tayangan barqaror taraqqiyot modeliga izchil oʻtayotganining yana bir amaliy ifodasi hisoblanadi.

Bugungi kunda jahonda energiya xavfsizligi, iqlim oʻzgarishi va ekologik barqarorlik masalalari davlat siyosati kun tartibining eng dolzarb yoʻnalishlaridan biriga aylangan. Mamlakatlar iqtisodiy rivojlanishni taʼminlash bilan bir vaqtda atrof-muhit muhofazasi va resurslardan oqilona foydalanish oʻrtasidagi muvozanatni saqlashga intilmoqda. Oʻzbekistonda ham qayta tiklanuvchi energiya manbalarini rivojlantirish, energiya tejamkor texnologiyalarni joriy etish va zamonaviy energetik infratuzilmani shakllantirishga qaratilgan keng koʻlamli ishlar amalga oshirilmoqda. Atom energetikasi loyihasi mazkur jarayonlarning mantiqiy davomi sifatida baholanmoqda.

Mazkur yirik loyiha mamlakatimizda yuqori malakali muhandislik kadrlarini tayyorlash, ilmiy-tadqiqot salohiyatini mustahkamlash, yangi ish oʻrinlarini yaratish hamda zamonaviy texnologiyalarni milliy iqtisodiyotga keng joriy etish uchun ham yangi imkoniyatlar ochadi. Shu bilan birga, u hududlar infratuzilmasini rivojlantirish, investitsiyalar jalb qilish va mahalliy ishlab chiqarish zanjirlarini kengaytirishga xizmat qilishi kutilmoqda.

«Ijtimoiy fikr» Respublika jamoatchilik fikrini oʻrganish markazi mamlakat taraqqiyotining strategik yoʻnalishlari, energetika sohasida amalga oshirilayotgan islohotlar, ekologik barqarorlik, yashil iqtisodiyot va innovatsion rivojlanish masalalari boʻyicha jamoatchilik fikrini muntazam ravishda oʻrganib kelmoqda. Markaz tomonidan oʻtkazilayotgan sotsiologik tadqiqotlarda fuqarolarning mamlakatdagi iqtisodiy va texnologik oʻzgarishlarga munosabati, energetika sohasida amalga oshirilayotgan loyihalar haqidagi qarashlari, energiya tejamkorligi madaniyati hamda ekologik xavfsizlik masalalariga oid fikrlari tahlil qilinmoqda.