INVESTITSIYALAR VA TARAQQIYOT: TIIF-2026 YANGI O‘ZBEKISTONNING IQTISODIY IMKONIYATLARINI NAMOYON ETMOQDA

Bugungi kunda investitsiyalar mamlakat iqtisodiyotining barqaror o‘sishi, yangi ish o‘rinlari yaratilishi, hududlarni rivojlantirish va aholi farovonligini oshirishning muhim omillaridan biri sifatida qaralmoqda. Shu nuqtai nazardan, 2026 yil 16–19 iyun kunlari Toshkent shahrida o‘tkazilayotgan V yubiley Toshkent xalqaro investitsiya forumi mamlakatning investitsiyaviy salohiyatini namoyon etish, xalqaro iqtisodiy hamkorlikni kengaytirish va Yangi O‘zbekistonning iqtisodiy taraqqiyot strategiyasini ilgari surishga xizmat qiluvchi muhim xalqaro maydon hisoblanadi. Forum Markaziy Osiyodagi yetakchi investitsiya platformalaridan biri sifatida e’tirof etilmoqda.

So‘nggi yillarda O‘zbekistonda amalga oshirilayotgan iqtisodiy islohotlar, xususiylashtirish jarayonlari, sanoatni modernizatsiya qilish, energetika sohasini transformatsiya qilish va investitsiya muhitini yaxshilashga qaratilgan chora-tadbirlar mamlakatning xalqaro investitsiya bozoridagi o‘rnini mustahkamlamoqda. Toshkent xalqaro investitsiya forumi ana shu o‘zgarishlarni xalqaro biznes hamjamiyatiga taqdim etuvchi muhim muloqot maydoni vazifasini bajarmoqda.

“Ijtimoiy fikr” Respublika jamoatchilik fikrini o‘rganish markazi tomonidan mamlakatda amalga oshirilayotgan ijtimoiy-iqtisodiy islohotlar, aholining iqtisodiy kutilmalari va taraqqiyot jarayonlariga munosabatini o‘rganishga qaratilgan tadqiqotlar natijalari shuni ko‘rsatadiki, aholi iqtisodiy o‘sish, yangi ish o‘rinlari yaratish, tadbirkorlikni qo‘llab-quvvatlash va investitsiyalarni jalb qilishni mamlakat taraqqiyotining muhim sharti sifatida baholaydi. Jamoatchilik fikrida iqtisodiy islohotlarning amaliy samarasi, avvalo, aholi bandligi, daromadlari va hayot sifatidagi ijobiy o‘zgarishlar bilan bog‘lanadi.

Sotsiologik nuqtai nazardan investitsiyalar iqtisodiy ko‘rsatkichlar bilan cheklanib qolmaydi. Ular aholining kelajakka ishonchi, ijtimoiy optimizmi va mamlakat taraqqiyotiga daxldorlik hissini shakllantiruvchi muhim ijtimoiy omil sifatida ham namoyon bo‘ladi. Xalqaro amaliyotda investitsiyaviy jozibadorlikni baholashda makroiqtisodiy barqarorlik bilan bir qatorda ijtimoiy barqarorlik, institutsional ishonch va jamoatchilik qo‘llab-quvvatlovi ham muhim mezonlar sifatida qaraladi.

Toshkent xalqaro investitsiya forumining ahamiyati ham aynan shu jihatlarda namoyon bo‘ladi. Forum davlat organlari, xalqaro moliya institutlari, suveren jamg‘armalar, transmilliy kompaniyalar va investorlar o‘rtasida to‘g‘ridan-to‘g‘ri muloqotni ta’minlash orqali iqtisodiy hamkorlik uchun yangi imkoniyatlar yaratadi. 2026 yilgi forumda minglab ishtirokchilar, xalqaro moliya tashkilotlari va dunyoning turli mamlakatlaridan kelgan investorlar ishtirok etishi kutilmoqda.

Tahlillar shuni ko‘rsatmoqdaki, forum doirasida muhokama qilinayotgan yo‘nalishlar mamlakat iqtisodiyotining ustuvor tarmoqlarini qamrab olgan. Jumladan, qayta tiklanuvchi energiya manbalari, infratuzilma, sanoat, raqamli iqtisodiyot, logistika, agrosanoat majmuasi va yuqori texnologiyalar sohalari bo‘yicha investitsiya loyihalari taqdim etilmoqda. Bu esa investitsiyalarning tarmoqlararo diversifikatsiyasi va iqtisodiy o‘sishning yangi nuqtalarini shakllantirishga xizmat qiladi.

“Ijtimoiy fikr” markazi nuqtai nazaridan qaraganda, investitsiyaviy jarayonlarning ijtimoiy samaradorligi birinchi navbatda aholi farovonligiga ta’siri bilan baholanadi. Yangi korxonalarning ishga tushirilishi, ish o‘rinlarining yaratilishi, hududiy infratuzilmaning takomillashishi va mehnat bozori imkoniyatlarining kengayishi aholining ijtimoiy kayfiyati va iqtisodiy faolligiga bevosita ta’sir ko‘rsatadi.

Shu ma’noda, Toshkent xalqaro investitsiya forumi nafaqat iqtisodiy hamkorlik maydoni, balki mamlakatning ijtimoiy rivojlanish istiqbollarini belgilashga xizmat qiluvchi muhim strategik platforma sifatida ham ahamiyat kasb etadi. Forum doirasida shakllanayotgan yangi sherikliklar va investitsiya kelishuvlari O‘zbekistonning barqaror iqtisodiy o‘sishi, raqobatbardoshligini oshirish va aholi farovonligini yuksaltirishga xizmat qilishi bilan ahamiyatlidir.

Bugun Toshkent xalqaro investitsiya forumi mamlakatning ochiq iqtisodiyot tamoyillariga sodiqligini, investitsiyalarga qulay muhit yaratish bo‘yicha olib borilayotgan izchil siyosatni hamda O‘zbekistonning xalqaro iqtisodiy makondagi nufuzini namoyon etayotgan muhim maydon sifatida e’tirof etilmoqda. Uning natijalari mamlakat iqtisodiyotining uzoq muddatli rivojlanishi va ijtimoiy taraqqiyoti uchun muhim ahamiyat kasb etadi.