2025 yil 13 avgust kuni “Ijtimoiy fikr” Respublika jamoatchilik fikrini oʻrganish markazida «Oʻzbekistonda jamoatchilik fikrini oʻrganish va shakllantirishning dolzarb muammolari: usullar, nazariya va amaliyot» doimiy ilmiy-amaliy seminari doirasida “2025 yilning birinchi yarim yilligidagi muhim voqealar faoliyatning asosiy yakunlari doirasida” mavzusida yigʻilish oʻtkazildi.

Tadbirda asosiy eʼtibor mamlakatda ijtimoiy fikr monitoringi, aholi kayfiyati va ijtimoiy jarayonlar tahlili boʻyicha amalga oshirilgan ishlarga qaratildi. Ushbu jarayonda sotsiologik tadqiqotlarning ilmiy-nazariy asoslarini mustahkamlash, metodik yondashuvlarni takomillashtirish va tadqiqot natijalarini amaliyotga joriy etish masalalari muhokama etildi.

Mazkur seminarni “Ijtimoiy fikr” markazi direktori ochib, 2025 yilning birinchi yarim yilligida amalga oshirilgan yirik tadqiqotlar, milliy va xalqaro hamkorlikdagi loyihalar, shuningdek, ilmiy-innovatsion yondashuvlar haqida atroflicha maʼlumot berdi. Uning taʼkidlashicha, jamoatchilik fikrini oʻrganish faqat raqamlar va statistika emas, balki mamlakatdagi ijtimoiy dinamikani chuqur anglash, aholi ehtiyojlari va kutilmalariga mos siyosat yuritish uchun muhim ilmiy asosdir.

Shuningdek ushbu yigʻilish davomida qator yoʻnalishlar boʻyicha hisobotlar taqdim etildi:

• Imamova Shaxlo Xatamovna – Markaz xodimlari faoliyati va kadrlar siyosatidagi yangiliklar haqida.
• Alekseyeva Viktoriya Sergeyevna, PhD – ilmiy tadqiqotlar samaradorligi va xalqaro ilmiy maydonda Markazning oʻrni toʻgʻrisida.
• Seitov Mansur Sherikbayevich, PhD – ilmiy ishlar va innovatsion tashabbuslar yoʻnalishida erishilgan natijalar haqida.
• Bokun Igor Mixaylovich – sotsiologik tadqiqotlarni axborot-matematik jihatdan taʼminlashning zamonaviy mexanizmlari.
• Muratov Timur Ravilevich – axborot texnologiyalari va axborot xavfsizligida qoʻllanilayotgan samarali usullar haqida.
• Xalikova Umida Muxamadjonovna – amaliy tadqiqotlarni tashkil etish va oʻtkazish tajribasi.
• Tadjibayev Azizbek Baxodir oʻgʻli – ilmiy-tahliliy tadqiqotlardan olingan xulosalar.
• Kulyapina Irina Mixaylovna – maʼmuriy-xoʻjalik jarayonlarini optimallashtirish haqida.

Muhokamalar jarayonida ishtirokchilar jamoatchilik fikrini oʻrganishdagi dolzarb metodologik masalalar, yangi texnologiyalarni joriy etish imkoniyatlari va tadqiqot natijalarini davlat boshqaruvi amaliyotida qoʻllash yoʻllarini koʻrib chiqdilar.

Seminar yakunida faol fikr-mulohazalar almashinib, sotsiologik tadqiqotlarning sifatini yanada oshirish, jamoatchilik fikrini oʻrganish jarayonlarini raqamli transformatsiya talablariga moslashtirish va natijalarni keng jamoatchilikka yetkazish borasida taklif va tavsiyalar bildirildi.