«Ijtimoiy fikr» respublika jamoatchilik fikrini oʻrganish markazi tomonidan mamlakat fuqarolari oʻrtasida 2025 yil yakunlariga bagʻishlangan respublika miqyosidagi sotsiologik soʻrov oʻtkazishni boshladi. Mazkur tadqiqot fuqarolarning 2025 yilda mamlakatimiz hayotida yuz bergan ijtimoiy-iqtisodiy jarayonlar, amalga oshirilgan islohotlar, davlat siyosati natijalari hamda jamiyatda shakllangan umumiy kayfiyatga boʻlgan munosabatini xolis va ilmiy asosda oʻrganishga qaratilgan.

Soʻrov orqali fuqarolarning 2025 yilni mamlakat uchun umumiy natija sifatida qanday baholayotgani, shaxsiy hayot va oilaviy farovonlikda yuz bergan oʻzgarishlar, moliyaviy ahvol va ish bilan bandlik holati, qoʻyilgan maqsad va rejalarga erishish darajasi kabi masalalar chuqur tahlil qilinadi. Shu bilan birga, aholining mamlakat hayotidagi ijobiy oʻzgarishlar yoki salbiy tendensiyalarga nisbatan munosabati, davlat idoralari faoliyati samaradorligiga bergan bahosi ham oʻrganilmoqda.

Savolnoma doirasida 2025 yilda erishilgan eng muhim yutuqlar qaysi sohalarga toʻgʻri kelgani, shuningdek, inflyatsiya, ishsizlik, aholi daromadlari, kommunal xizmatlar, taʼlim va sogʻliqni saqlash tizimi, ekologik vaziyat, korrupsiya, ijtimoiy tengsizlik kabi muammolar fuqarolar tomonidan qay darajada dolzarb deb hisoblanayotgani aniqlanadi. Bu maʼlumotlar jamiyatdagi real ijtimoiy ehtiyojlar va xavotirlar manzarasini shakllantirishga xizmat qiladi.

Alohida eʼtibor 2025 yilning “Atrof-muhitni asrash va yashil iqtisodiyot yili” sifatida eʼlon qilinishi doirasida amalga oshirilgan ishlarga fuqarolar qanday baho berganiga qaratilgan. Ekologik tashabbuslar, yashil iqtisodiyot gʻoyalari va ularning kundalik hayotda sezilish darajasi jamoatchilik fikri asosida tahlil qilinadi.

Soʻrov, shuningdek, fuqarolarning hozirgi hayotdan qoniqish darajasi, kelajakka nisbatan xotirjam yoki xavotirli munosabati, oʻz fikrini bildirishga tayyorlik holati, ehtimoliy norozilik omillari hamda 2026 yil uchun ustuvor deb hisoblanayotgan rivojlanish yoʻnalishlarini qamrab oladi. Bu esa jamiyatdagi ijtimoiy kayfiyat, ishonch va kutilmalarni kompleks baholash imkonini beradi.