«Yosh sotsiologlar uchun yozgi maktab:sotsiologik tadqiqot usullari»

2023-yil 21-26-avgust kunlari Toshkent shahridagi Xalqaro Vestminster universitetida yosh talabalar, doktorantlar, o‘qituvchilar, tadqiqotchilar va amaliyotchilar uchun sotsiologiya va unga aloqador sohalar bo‘yicha etakchi olimlar bilan ilmiy muloqotni rivojlantirish maqsadida O‘zbekiston sotsiologlar assotsiatsiyasi, Toshkent shahridagi Xalqaro Vestminster universiteti hamda Fridrix Ebert hamkorligida yozgi maktab tashkil etildi.

Ushbu maktab O‘zbekiston sotsiologlariga xalqaro sotsiologlar tarmog‘iga qo‘shilish va o‘z ilmiy malakasini oshirishga yordam beradi. Bundan tashqari, Xalqaro sotsiologlar assotsiatsiyasi va O‘zbekiston sotsiologlar assotsiatsiyasiga a’zo bo‘lish, o‘z sotsiologik faoliyatini jahon miqyosida namoyish etish imkoniyati mavjud.

Sotsiologiya, siyosatshunoslik, iqtisodiyot, tarix, huquq va boshqalar sohasidagi xalqaro va mahalliy olimlar, Xalqaro sotsiologlar assotsiatsiyasi va O‘zbekiston sotsiologlar assotsiatsiyasi a’zolari, Toshkentdagi Xalqaro Vestminster universiteti vakillari, «Ijtimoiy fikr» respublika jamoatchilik fikrini o‘rganish Markazi va Mirzo Ulug‘bek nomidagi O‘zbekiston Milliy universiteti vakillari saboq beruvchilar bo‘lishdi.

Ushbu maktab iqtidorli va eng faol yosh sotsiologlar, talabalar, magistrantlar, doktorantlarning malakasini, kasbiy bilim va ko‘nikmalarini oshirish, ilmiy-amaliy metodologiya va usullardan foydalangan holda xalqaro standartlarga muvofiq ilmiy-tadqiqot ko‘nikmalarini shakllantirish va kelajakda empirik sotsiologiyani sifatli va samarali rivojlantirish maqsadida o‘tkazildi.

21-avgust kuni bo‘lib o‘tgan tadbirda «Ijtimoiy fikr» RJFO‘M yetakchi xodimlari Sherzod Boboyev va Ravshan Islambayev o‘zlarining quyidagi mavzudagi  mahorat darslari va ma’ruzalarini taqdim etdilar: «Ijtimoiy fikr» bazasida  sotsiologik tadqiqotlarning innovatsion usullarini qo‘llash». Tadbir yakunida ular tadqiqotlar tanlovini  tashkil etish, telefon so‘rovlari va dala planshetlarini tadqiq qilishning reprezentativligini ta’minlash, sotsiologik amaliyotda telefon so‘rovining afzalliklari va kamchiliklari hamda tadqiqotga intervyuerlarni tanlashda, eng avvalo, qanday xususiyatlarga e’tibor qaratishlari haqidagi savollarga javob berdilar.

Taqdimotda «Ijtimoiy fikr» Markazining sotsiologik tadqiqotlarni o‘tkazish texnologiyasida  quyidagi dasturlarni qo‘llashga va ulardan foydalanishga  alohida o‘rin ajratildi:

«Naumen» - aloqa  markazini tashkil qilish uchun zarur bo‘lgan barcha narsalarni o‘z ichiga olgan keng qamrovli dasturiy echim; «CATI» usulidan telefon so‘rovi o‘tkazish uchun foydalaniladi; «DigSee Sure» - «TAPI» usuli bilan planshetlarda so‘rov o‘tkazish uchun ham online, ham offline rejimda ishlaydigan dasturiy ta’minot; «Power BI» - bu bir nechta dasturiy mahsulotlarni umumiy texnologik va vizual dizayn, ulagichlar, shuningdek veb-xizmatlar bilan birlashtirgan holda olingan ma’lumotlarni onlayn tahlil qilish va vizualizatsiya qilish uchun keng qamrovli dasturiy ta’minot; «SPSS Statistics» - ko‘p miqdordagi ma’lumotlarni qayta ishlash uchun mo‘ljallangan statistik ma’lumotlarni qayta ishlash uchun dasturiy vosita va olingan ma’lumotlarni talqin qilish imkoniyati uchun  ma’lumotlarni vizualizatsiya qilish maqsadida  issiqlik xaritalari bilan ishlashni mo‘ljallab ishlab chiqilgan skriptlar.