Zamonaviy maktab o‘quvchilari hayotida Internet

 

Axborot jamiyatida rivojlanish istiqboli birinchi navbatda axborotning isteʼmoli bilan bog‘liq. Bugungi kunda Internet nafaqat kattalar, balki bolalar uchun ham axborotning asosiy manbalaridan biriga aylanmoqda.

Yildan-yilga Internet foydalanuvchilari hamjamiyati yosharib bormoqda. O‘smirlar uchun kitoblar, televideniye, jurnallar bilan solishtirganda asosiy maʼlumot manbai Internet bo‘lib qolmoqda, u o‘qituvchilar va do‘stlar bilan raqobatlashib, qisman ota-onalarning o‘rnini ham egallamoqda.

Ko‘pgina bolalar maktabda Internet bilan tanishadilar va uni juda tez o‘zlashtiradilar, so‘ng o‘qituvchilar hamda ota-onalarga qaraganda faolroq Internet foydalanuvchilariga aylanishadi, foydalanuvchilik tajribasini kattalarga qaraganda tezroq to‘plashadi. Shu bilan birga, Internetdagi xavfsiz xulq-atvor to‘g‘risida o‘smirlarning bilimlari yetishmasligi aniq. Ularga Internetda xavfsiz ishlashni o‘rgatish uchun ota-onalar va o‘qituvchilar bolalarning virtual olamida nimalar bo‘layotganini, ularning hayotida Internet qanchalik muhim o‘rin egallayotganligini bilishlari kerak.O‘zbekistonda maktablarda yangi o‘quv yili boshlanishi munosabati bilan “Ijtimoiy fikr” respublika jamoatchilik fikrini o‘rganish Markazi “Maktab o‘quvchilari va Internet” mavzusidagi kompleks sotsiologik tadqiqot doirasida jamoatchilik fikrini majmuaviy o‘rganishni boshladi. Tadqiqotning maqsadi - ota-onalar o‘z farzandining Internetdan foydalanayotganidan qanchalik darajada xabardorligini, bola u yoki bu xavfsiz yoki xatarli veb-saytlarga kirish orqali nimalarga qiziqish bildirayotganini aniqlash, shuningdek, Internetning maktab o‘quvchilariga ijobiy va salbiy taʼsiri haqida ota-onalarning fikrini o‘rganish va tahlil etishdan iborat.