ONA TILI - MILLAT G‘URURI, MILLIY O‘ZLIK VA MA’NAVIY YUKSALISH TIMSOLI!

Aziz yurtdoshlar! Qadrli vatandoshlar!

«Ijtimoiy fikr» respublika jamoatchilik fikrini o‘rganish markazi jamoasi siz, azizlarni 21 oktabr - O‘zbek tili bayrami kuni bilan samimiy muborakbod etadi!

Ona tili - xalqning tarixiy xotirasi, milliy o‘zligi, ma’naviy merosi va asrlar davomida shakllangan tafakkur madaniyatini o‘zida mujassam etgan bebaho boylikdir. U millatning kechmishi va bugunini bog‘laydi, avlodlar o‘rtasidagi ma’naviy vorisiylikni ta’minlaydi, jamiyatning umumiy qadriyatlar atrofida birlashishiga xizmat qiladi.

1989 yil 21 oktabrda o‘zbek tiliga davlat tili maqomining berilishi xalqimiz hayotida ulkan tarixiy voqea bo‘ldi. Ushbu sana milliy o‘zlikni anglash, ona tilimizga bo‘lgan hurmat va e’tiborni yuksaltirish, uning davlat va jamiyat hayotidagi o‘rnini mustahkamlash yo‘lida yangi davrni boshlab berdi.

Bugun o‘zbek tili ilm-fan, ta’lim, madaniyat, davlat boshqaruvi va raqamli texnologiyalar sohalarida o‘z imkoniyatlarini kengaytirib, jamiyatimiz ma’naviy va intellektual taraqqiyotining muhim omili sifatida rivojlanmoqda.

Ayniqsa, ona tilimizning jamiyatdagi nufuzini oshirish, uning ilmiy va ijodiy salohiyatini boyitish, yosh avlod qalbida milliy tilga hurmat va iftixor tuyg‘ularini mustahkamlash barchamizning umumiy mas’uliyatimizdir.

Zero, til jamiyatni birlashtiruvchi, insonlar o‘rtasida o‘zaro anglashuv, ijtimoiy ishonch va hamjihatlikni qaror toptiruvchi muhim ma’naviy kuchdir. Unda xalqning orzu-intilishlari, hayotiy qarashlari, ijtimoiy tajribasi va kelajakka bo‘lgan ishonchi o‘z ifodasini topadi.

Buyuk mutafakkir Alisher Navoiy yuksak badiiy tafakkur darajasiga ko‘targan ona tilimiz bugun ham milliy madaniyatimiz, ma’rifatimiz va ijtimoiy taraqqiyotimizning mustahkam tayanchi bo‘lib xizmat qilmoqda.

Aziz vatandoshlar! Ona tilimiz har bir xonadonda mehr-oqibat, har bir ta’lim maskanida ma’rifat, har bir ilmiy izlanishda tafakkur, har bir ezgu tashabbusda taraqqiyot sadosi bo‘lib yangrasin!

Farzandlarimiz ona tilimizning boyligidan faxrlanib ulg‘aysin, uning qadrini anglab, sofligi va jozibasini asrab-avaylasin. O‘zbek tilining nufuzi va shuhrati xalqaro maydonda yanada yuksalib, xalqimizning intellektual salohiyati va ma’naviy qudratini dunyoga tarannum etsin!

Hurmat bilan,

«Ijtimoiy fikr» respublika

jamoatchilik fikrini o‘rganish markazi jamoasi!