Спорт куч, саломатлик ва ҳамжиҳатлик мактаби сифатида: Президентнинг стратегик ташаббуслари ҳақида жамоатчилик фикри

Бугунги кунда Янги Ўзбекистон янгиланиш ва модернизациялаш йўлидан ишончли ва изчил равишда бораётган бир пайтда, жисмоний тарбия ва спорт давлат сиёсатининг муҳим таркибий қисмига, миллат саломатлигининг пойдеворига ва миллий ғурур манбаига айланиб бормоқда. Президент Шавкат Мирзиёевнинг Осиё Олимпия Кенгашининг 46-Бош Ассамблеясидаги нутқи айнан спортни ривожлантириш, халқаро ҳамкорликни мустаҳкамлаш ва илғор стандартларни жорий этиш масалаларига бағишланди. Осиё Олимпия Кенгашининг Бош Ассамблеяси доирасида халқаро ва Осиё спорт ташкилотлари ҳамда миллий спорт федерациялари ўртасида 20дан зиёд муҳим битимлар имзоланди. Ушбу ҳужжатлар аниқ мақсадларга эришишга, энг аввало, мамлакат минтақаларида спортни ривожлантиришга қаратилган. Халқаро ҳамкорлар ўз йўналишлари бўйича ҳар бир минтақадан биттадан спорт мактабини танлаб олиб, уларни ҳақиқий намунага айлантиришга кўмаклашишга тайёр эканликларини билдирдилар. Ушбу лойиҳаларни тўлиқ амалга ошириш учун шахсий масъулият Президентнинг жойлардаги маҳаллий вакиллари – ҳокимлар, шунингдек, спорт федерациялари раҳбарларига юклатилиши принципиал жиҳатдан жуда муҳимдир. Бундай ёндашув қўйилган вазифаларнинг давлат миқёсидаги аҳамиятини ва уларнинг аниқ натижаларга йўналтирилганлигини таъкидлайди. Халқаро ҳамкорликнинг давлат Раҳбари томонидан тилга олинган янги механизмлари спортни ривожлантириш ва аҳоли саломатлигини мустаҳкамлашга салмоқли амалий ҳисса қўшишга мўлжалланган.

Спорт ва жисмоний тарбия – бу шундай соҳаларки, уларда давлат сиёсати фуқароларнинг кундалик ҳаёти билан бевосита яқиндан туташади. Айнан шунинг учун ҳам "Ижтимоий фикр" республика жамоатчилик фикрини ўрганиш Маркази томонидан олиб борилаётган, фуқаролар овозини эшитиш, уларнинг баҳоси ва кутилмаларини англаш имконини берадиган тадқиқотлар муҳим ижтимоий аҳамиятга эгадир.

Президент ташаббуслари туфайли ижобий томонга ўзгарган соҳа ва йўналишларни аниқлаш давомида спортни ривожлантириш ва мамлакат эришган спорт ютуқлари энг юқори баҳоларга сазовор бўлди. Олинган натижалар сўнгги йилларда мамлакатимизда спортнинг янада оммавийроқ, кучлироқ ва натижадорроқ бўлиб бораётгани, ўзбекистонлик спортчиларнинг ғалабалари эса умумий қувонч ва миллий ғурур манбаи сифатида идрок этилаётгани жамоатчилик томонидан эътироф этилишини акс эттиради.

Тадқиқот натижалари, шунингдек, спорт инфратузилмасини ривожлантириш, янги майдонлар ва спорт иншоотларини барпо этишга қаратилган чора-тадбирлар аҳоли томонидан юқори даражада  қўллаб-қувватланаётганини аниқлади. Жамоатчилик фикрида миллат саломатлиги, худди спортда эришилаётган юқори даражали ютуқлар каби, қулай ва замонавий спортча муҳитдан бошланиши ҳақида аниқ тасаввур шаклланган.

Сўров давомида оммавий спорт ва жисмоний фаоллик масалаларига ҳам барқарор эътибор қаратилаётгани аниқланди. Ижтимоий онг учун спорт – бу нафақат катта ареналар ва улкан ғалабалар  бўлибгина қолмай, балки кундалик ҳаракат, фаол дам олиш ҳамда болалар, ёшлар ва катта авлоднинг мамлакат жисмоний тарбияси оламидаги иштироки ҳам эканлиги тобора равшанлашиб бормоқда.

Шундай қилиб, социологик тадқиқотлар натижалари давлатимиз Раҳбарининг спорт соҳасидаги таклиф ва ташаббуслари фуқаролар орасида кенг қўллаб-қувватланаётганини тасдиқлайди. Жамоатчилик фикри соҳанинг изчил ривожланиши, спорт инфратузилмасининг кенгайиши ва соғлом турмуш тарзига тобора кўпроқ эътибор қаратилаётганини қайд этди. Бу халқаро келишувларни амалга ошириш ва глобал спорт ҳамжамиятида Ўзбекистоннинг мавқеини янада мустаҳкамлаш учун мустаҳкам ижтимоий замин яратади.

Хулоса ўрнида таъкидлаш керакки, Президент томонидан спортни ривожлантириш бўйича белгиланган курс жамият томонидан мамлакат умумий тараққиётининг муҳим таркибий қисми сифатида идрок этилмоқда. Спорт соҳасидаги кўп қиррали халқаро ҳамкорликка Янги Ўзбекистоннинг тайёрлиги одамларнинг келажакка, миллат саломатлигига ҳамда спорт майдонлари ва ҳаётдаги янги ғалабаларга ишончини мустаҳкамлаб, улар қалбида акс-садо бермоқда.