“Ижтимоий фикр” Республика жамоатчилик фикрини ўрганиш маркази Гульшан Алимардонованинг Қоҳирада бўлиб ўтган жаҳон чемпионатида қўлга киритган ғалабасини улкан ифтихор билан қайд этади. Алимардонова –50 кг вазн тоифасида аёллар кумитэ йўналиши бўйича жаҳон чемпиони унвонини қўлга киритиб, Ўзбекистон спорт тарихида янги саҳифа очди. Унинг Малайзия вакили устидан 6:1 ҳисобида қозонган ишончли ғалабаси юксак маҳорат, профессионал тайёргарлик ва матонатли ироданинг ёрқин ифодаси сифатида эътироф этилмоқда.

Гульшан Алимардонованинг зафари сўнгги йилларда ўзбек спортчи аёлларининг халқаро майдонда эришган муваффақиятлари билан узвий боғлиқ. Мазкур ривожланиш мамлакатимизда аёллар спортининг барқарор ўсиши ва давлат томонидан спорт соҳасига қаратилган тизимли қўллаб-қувватлаш сиёсати самараси эканини кўрсатмоқда.

2021 йилда дзюдо йўналишида Диёра Келдиёрова жаҳон чемпионатидаги барқарор чиқишлари билан эътиборга тушди. У кейинги йилларда — 2022, 2023 ва айниқса 2024 йил Париж Олимпиадасида –52 кг вазн тоифасида қўлга киритган олтин медали билан ўзбек дзюдоси тарихида илк аёл олимпия чемпиони сифатида эътироф этилди. Келдиёрованинг натижалари мамлакатда дзюдога бўлган қизиқишни кучайтириб, ёшлар учун янги имкониятлар эшигини очди.

2022 йилда таэквондо бўйича Светлана Осипова Гвадалахарада ўтган WT World Taekwondo Championships мусобақасида +73 кг вазн тоифасида жаҳон чемпиони унвонини қўлга киритди. Унинг ғалабаси таэквондо бўйича миллий терма жамоамиз салоҳиятини халқаро миқёсда янада юксалтирди.

2025 йилда пара-атлетика йўналишида юртимиз учун яна бир муҳим зафар қайд этилди. Нью-Делидаги World Para Athletics Championships мусобақасида Ф46 тоифасида ядро улоқтириш бўйича иштирок этган Каромат Омонова Осиё рекордини янгилаб, жаҳон чемпиони унвонига сазовор бўлди. Унинг натижаси Ўзбекистонда пара-спорт ривожининг изчил ва барқарор йўналишда бораётганини тасдиқлади.

Ана шу изчил ривожланиш мантиқий давом сифатида 2025 йилда Гульшан Алимардонова каратэ бўйича жаҳон чемпионига айланди. Унинг зафари нафақат спорт жамоатчилиги, балки кенг жамоат учун ҳам юксак ифтихор ва мотивация манбаига айланди. Алимардонованинг ғалабаси аёллар спортида янги стандартларни белгилаб, ёш авлод учун кучли руҳий рағбат манбаи бўлиб хизмат қилмоқда.

Ўзбекистонда спортни ривожлантириш, аёллар ўртасида спорт турларини оммалаштириш, ёш спортчиларни ҳар томонлама қўллаб-қувватлашга қаратилган давлат сиёсати эса айни вақтда ўз самарасини бераётгани бу натижалар билан яна бир бор тасдиқланмоқда. Замонавий спорт инфратузилмасининг яратилиши, юқори малакали мураббийлар тайёрланиши, ёшлар учун танлов ва имкониятларнинг кенгайиши мамлакатда жаҳон стандартларига мос спорт муҳитини шакллантирмоқда.

“Ижтимоий фикр” республика жамоатчилик фикрини ўрганиш маркази номидан Гульшан Алимардоновани ва юртдошларимизни ушбу тарихий ютуқ билан табриклаймиз. Унга мустаҳкам соғлик, барқарор омад ва келгусида янада юксак зафарлар тилаймиз. Мазкур ғалаба миллий спортимиз тараққиётида муҳим босқич бўлиб, ёшларимизнинг халқаро ижтимоий-спорт майдонида муносиб ўрин эгаллашга қаратилган интилишларига янада куч қўшишига ишонамиз.