2025 йил 28 ноябрь куни “Ижтимоий фикр” республика жамоатчлик фикрини ўрганиш Марказида “Ўзбекистонда жамоатчилик фикрини ўрганиш ва шакллантиришнинг долзарб муаммолари: усуллар, назария ва амалиёт” доимий илмий-амалий семинари доирасида академик Раъно Убайдуллаева номидаги анъанавий социологик ўқишларнинг навбатдаги тўртинчи халқаро тадбири бўлиб ўтди. Бу йилги тадбир “Глобаллашув ва кенг кўламли ислоҳотлар шароитида Ўзбекистонда ижтимоий жараёнлар динамикаси ва трансформацияси” мавзусига бағишланди.

XXI аср бошида глобаллашув, рақамли технологиялар ва халқаро мобилликнинг шиддат билан ўсиши жамият ҳаётида бутунлай янги воқеликни вужудга келтирди. Ижтимоий тузилмалардаги янгиланишлар, қадриятлар тизимининг трансформацияси, иқтисодий ва маданий жараёнлар тезлашмоқда. Бу ўзгаришлар ҳар бир жамият олдига янги вазифаларни қўймоқда.

Ўзбекистон ҳам мазкур жараёнларнинг фаол иштирокчиси сифатида демократик институтларни мустаҳкамлаш, давлат бошқарувини модернизация қилиш ва инсон капиталига қаратилган кенг кўламли ислоҳотларни амалга оширишни давом эттирмоқда. “Ўзбекистон – 2030” стратегиясининг устувор йўналишлари — барқарор ривожланиш, “яшил” иқтисодиёт, рақамли хизматлар ва ижтимоий соҳани такомиллаштириш бугунги куннинг муҳим вазифаларидан ҳисобланади.

Тадбирда давлат идоралари, жамоат ташкилотлари, ННТ, оммавий ахборот воситалари, маҳаллий ва хорижий олимлар, социологлар, докторантлар ва талабалар иштирок этди. Мажлис оффлайн ва онлайн форматда, ZOOM платформаси орқали ҳамда “Ижтимоий фикр” республика жамоатчилик фикрини ўрганиш Маркази мажлислар залида ташкил этилди.

Семинар ишини таниқли олимлар ва йирик илмий муассаса раҳбарлари очиб берди. Хусусан, Г.В.Плеханов номидаги Россия иқтисодиёт университети Тошкент филиали директори, академик Абдураҳмонов Қаландар Ходжаевич сўзга чиқиб жамиятдаги ижтимоий ўзгаришларнинг тезкор динамикаси ва уларни илмий асосда таҳлил қилиш зарурлигини таъкидлади.

Россия Федерациясидан «Социологические исследования» журнали таҳрир кенгаши раиси, Россия Гуманитар университети социология кафедраси мудири, РФА мухбир-аъзоси, ф.ф.д., профессор Тошенко Жан Терентьевич замонавий социологиянинг долзарб йўналишлари ва аҳамияти ҳақида фикр билдириб, семинар ишига ривож тилади.

Шунингдек, тадбир давомида Қозоғистон социологлар ассоциацияси илмий раҳбари, ҚРда хизмат кўрсатган арбоб, ҚР МФА академиги, с.ф.д., профессор Шаукенова Зарема Каукеновна табрик сўзи билан иштирок этиб, социологик тадқиқотлар ва ижтимоий трансформация ўртасидаги ўзаро боғлиқлик ҳақидаги фикри билан ўртоқлашди.

Семинарда Ўзбекистон Республикаси Президенти ҳузуридаги Стратетик ва минтақалараро тадқиқотлар институти директори ўринбосари, ф.ф.н. Нуруллаева Шафоат Файзуллаевна сўз олиб, социологик тадқиқотларнинг долзарблиги фақатгина аналитик таҳлил қилиш билан эмас, балки аҳоли кайфиятини, ижтимоий жараёнларнинг ўсиш нуқтасини аниқлаш, ўзгаришлар сабабини билиш билан мазкур вазиятда самарали ечим таклиф қилиш муҳимлигини таъкидлади.

БутунРоссия жамоатчилик фикрини ўрганиш маркази (ВЦИОМ) Таҳлил марказининг Илмий кенгаши раиси, с.ф.н. Львов Степан Васильевич Марказ билан кўп йиллик ҳамкорлик ривожини алоҳида қайд этиб, келгусида ҳамкорлик алоқаларини янада кучайтириш зарурлигини таъкидлади.

Семинарда “Ижтимоий фикр” республика жамоатчилик фикрини ўрганиш маркази экспертлари қатор долзарб мавзуларда маърузалар тақдим этди. Жумладан, Марказ директорининг илмий ишлар бўйича ўринбосари, социология фанлари бўйича фалсафа доктори (PhD) Сеитов Мансур Шерикбаевич “Ўзбекистон жамиятида жамоатчилик кайфиятининг ўзгариш динамикаси: 2025 йил ижтимоий тадқиқотлар таҳлили” мавзусида маъруза қилди.

Марказнинг илмий-таҳлилий бўлими мудири, Таджибаев Азизбек Баҳодир ўғли “Глобаллашув ва кенг кўламли ислоҳотлар шароитида Ўзбекистонда ижтимоий жараёнлар динамикаси ва трансформацияси” мавзусидаги илмий тўплам тақдимотини ўтказди.

Семинар доирасида тайёрланган илмий тўплам мамлакатда кечаётган ижтимоий жараёнларни ҳар томонлама тадқиқ этишга бағишланган бўлиб, унда институционал ўзгаришлар таҳлили, ижтимоий қадриятлар эволюцияси, иқтисодий модернизациянинг ижтимоий таъсири, рақамли трансформация жараёнлари, жамоатчилик фикридаги тенденциялар бўйича илмий ҳамда амалий хулосалар баён этилган. Тўпламда маҳаллий ва хорижий тадқиқотчилар, докторантлар, олимларнинг илмий ишлари жой олгани фанлар ўртасидаги мулоқот ва ҳамкорлик кучайиб бораётганидан далолат беради.

Жаҳон иқтисодиёти ва дипломатияси университети профессори, социология фанлари доктори Сеитов Азамат Пўлатович "Ижтимоий фикр" Маркази томонидан ўтказилаётган тадқиқотларнинг муҳимлиги ва илмийлигини, бундай семинарлар Ўзбекистон социологларини бирлаштиришини таъкидлаб, келгусида Ўзбекистонда Социология институтини очиш таклифини киритди.

Тадбир якунида қатнашчилар томонидан жамиятда кечаётган ўзгаришларни илмий асосда ўрганиш, глобал ва маҳаллий тенденциялар уйғунлигини таҳлил қилиш ва жамоатчилик фикрини ёрқин амалий қарорлар қабул қилишда фаол қўллаш бўйича таклифлар илгари сурилди.