Ҳурматли юртдошлар! Азиз ватандошлар барчангизни кириб келаётган мустақиллик куни билан самимий муборакбод этамиз!

Мустақиллик — халқимизнинг тарихий ўзлигини тиклаган, миллий ғурурини юксалтирган ва эркин тараққиёт йўлини очиб берган беқиёс неъматдир.

1991 йил 1 сентябрь — юртимиз тарихида буюк бурилиш нуқтаси бўлди. Асрлар давомида орзу қилинган мустақиллик халқимизнинг қонуний орзуси, эркин ҳаётга интилиши ва озод жамият қуриш йўлидаги курашининг мантиқий давоми сифатида юзага келди.

Шундан бери ўтган йиллар ичида Ўзбекистон сиёсий, иқтисодий ва маънавий соҳаларда улкан ўзгаришларга эришди. Давлат мустақиллиги халқимизнинг тақдирини ўз қўлига олиши, демократик ҳуқуқий давлат барпо этиши ва жамият ҳаётида фуқаролик иштироки ортиб боришига йўл очди.

Бугунги кунда “Янги Ўзбекистон” ғояси ва ислоҳотлар жараёни халқимиз ҳаётида сифат жиҳатидан янги босқични бошлади. Халқнинг овози, жамоатчилик фикри давлат қарорлари қабул қилиш жараёнида ҳал қилувчи аҳамиятга эга бўлиб бормоқда. Бу — фақат сиёсий ёки иқтисодий ўзгариш эмас, балки жамият онгидаги улкан трансформациядир.

“Ижтимоий фикр” маркази ходимлари сифатида биз мустақиллик туфайли халқ фикри, унинг кайфияти ва орзу-умидларига кенг йўл очилганини алоҳида таъкидлаймиз. Социологик тадқиқотлар орқали жамиятда кечаётган жараёнларни илмий асосда таҳлил қилиш, халқ овозини давлат сиёсатининг юрак уришига айлантириш биз учун ҳам шараф, ҳам масъулиятдир.

Мустақиллик — бу жамиятнинг бирдамлиги, миллатнинг ўз тақдирига эгалиги ва келажакка ишончидир. Шу улуғ санада сизларни чин дилдан муборакбод этамиз. Сизларга тинчлик, фаровонлик ва эртанги кунга ишонч тилаймиз.

Яшасин мустақил Ўзбекистон!

 

Ҳурмат билан,

“Ижтимоий фикр” республика

жамоатчилик фикрини ўрганиш Маркази жамоаси!