02.04.2025
17
ҲАМЖИҲАТЛИК ЧEГАРАЛАРИ: ЎЗБEКИСТОН ВА МАРКАЗИЙ ОСИЁНИНГ БАРЧА МИНТАҚАЛАРИ УЧУН ЯНГИ БОСҚИЧ
2025 йил 31 март куни Хўжандда Марказий Осиё қиёфасини тубдан ўзгартириб юборадиган воқеа содир бўлди. Ўзбекистон, Тожикистон ва Қирғизистон давлат чегараларининг туташ нуқтаси тўғрисидаги шартноманинг имзоланиши тарихий зиддиятларни бартараф этиш ва яхши қўшничиликни янада ривожлантириш рамзи бўлди. Уч давлат тарихидаги жуда мураккаб, аммо ғоят муҳим босқич якунланди, бу орқали бутун минтақада барқарор тинчлик, хавфсизлик ва фаровонликка кенг йўл очилди.
Чегара билан боғлиқ ҳал этилмаган масалалар кескинлик ва қарама-қаршиликларни келтириб чиқариб, кўп йиллар давомида уч давлатнинг ҳамжиҳатлиги йўлида тўсиқ бўлиб келмоқда эди. Ниҳоят бу масала буткул ҳал қилинди, шартноманинг ўзи эса янги давр – келишув, ҳамкорлик ва ўзаро ишонч даври тимсолига айланди.
“Ижтимоий фикр” республика жамоатчилик фикрини ўрганиш Маркази томонидан олиб борилаётган тадқиқотлар натижалари шуни кўрсатадики, Ўзбекистон фуқаролари мамлакат Президенти Ш.М.Мирзиёевнинг ташқи сиёсатини нафақат қўллаб-қувватламоқдалар, балки уни мамлакат ва минтақада тинчлик ва барқарорликни таъминлашга қаратилган ислоҳотларнинг табиий давоми сифатида ҳам идрок этмоқдалар. Сўров натижалари Ўзбекистон бутун минтақада хавфсизликни таъминлашда муҳим роль ўйнашига 77,9% респондентларнинг ишончи комил эканлигидан яққол далолат бермоқда. Мамлакат раҳбариятининг давлатлараро мулоқот ва иқтисодий ҳамкорликни мустаҳкамлаш, чегара масалаларини якуний тартибга солиш борасидаги ташаббуслари аҳоли қалбида нафақат қўллаб-қувватлаш туйғусини, балки ўз мамлакати билан фахр-ифтихор ҳисларини уйғотмоқда.
Давлатимиз раҳбари томонидан амалга оширилаётган ислоҳотлар нафақат модернизациялаш дастурларига айланиб бормоқда - балки ҳар бир ўзбекистонлик ҳаётини ўзгартириб, улар учун янги истиқболлар очиб бермоқда. Иқтисодиёт мустаҳкамланиб, инновацион технологиялар жорий этилмоқда, фуқароларнинг ҳуқуқ ва эркинликлари кенгаймоқда. Ўзбекистон - бугунги кунда демократик ўзгаришлар йўлидан дадил одимлаётган мамлакат, бунда инсон, унинг фаровонлиги, эртанги кунга ишончи асосий қадрият ҳисобланади.
Жамоатчилик фикри Ўзбекистоннинг жаҳондаги обрў-эътибори тобора кучли равишда ортиб бораётганидан далолат беради. Сўров натижаларига кўра, мамлакатимиз фуқароларининг 83,8% қисми мамлакат имижи тубдан ўзгарганини, унинг халқаро майдонда фаол, нуфузли ва обрў-эътиборли иштирокчи давлатга айланганини қайд этмоқда. Ўзбекистон фуқаролар томонидан тараққиёт йўлини танлаган, ҳамкорликка очиқ, цивилизациянинг илғор ютуқлари сари одимлаётган давлат сифатида идрок этилмоқда.
Айниқса, энг муҳими шуки, бу ўзгаришлар одамларни руҳлантирмоқда. РЖФЎМ томонидан олиб борилган тадқиқотлар натижалари яқин келажакда Ўзбекистон юксак даражада ривожланган ва гуллаб-яшнаган давлатга айланишига 82,1% респондентларнинг ишончлари сўзсиз комил эканлигини тасдиқлайди.
Бу рақамлар кўп нарсадан далолат беради. Улар нафақат ислоҳотлар қўллаб-қувватлаётганини, балки танланган йўлнинг тўғрилигига халқнинг ички ишончини ҳам намоён этмоқда. Ўзбекистонликлар юртимиз ўзгараётганини дилдан англамоқдалар ва улар бу ўзгаришларнинг таркибий қисми бўлишга, ўз ҳиссасини қўшишга, жонажон юрт фаровонлиги йўлида меҳнат қилишга тайёрликларини изҳор этмоқдалар.
“Ижтимоий фикр” республика жамоатчилик фикрини ўрганиш Маркази томонидан олиб борилган тадқиқотлар халқ овози тиниқ ва ишончли янграётганини яна бир карра тасдиқлайди. Тадқиқот натижаларини таҳлил қилиш нафақат жамиятнинг кайфиятини қайд этади, балки юз бераётган жараёнларни англаш учун муҳим воситага айланмоқда. Ўтказилаётган тадқиқотларнинг долзарблиги, чуқур ва ҳаққонийлиги нафақат мавжуд вазиятни баҳолаш, балки давлат, жамият ва ҳар бир фуқаронинг реал эҳтиёжларига йўналтирилган узоқ муддатли ривожланиш стратегиясини шакллантириш имконини беради.
Бугун Ўзбекистон янги давр – бунёдкорлик, аҳиллик ва фаровонлик даври остонасида турибди. Чегаралар тўғрисида имзоланган шартнома, амалга оширилаётган ислоҳотлар, фуқаролар ишончининг ортиши – буларнинг барчаси янги воқеликнинг рамзи бўлмиш мустаҳкам бир занжирнинг чамбарчас боғлиқ бўғинларидир. Бу нафақат мамлакат раҳбарияти томонидан, балки эртанги кунига ишонч билан боқаётган фуқаролар қалбида ҳам мамлакат келажагини шакллантираётган ҳақиқатдир.