Самарқанд - 2025: “Марказий Осиё – Европа Иттифоқи” биринчи саммити

3-4 апрель кунлари Самарқанд шаҳрида тарихий воқеа - “Марказий Осиё – Европа Иттифоқи” биринчи саммити бўлиб ўтмоқда. Ўзбекистон Республикаси Президенти Шавкат Мирзиёев раислигида бўлиб ўтаётган саммитда Қозоғистон, Қирғиз Республикаси, Тожикистон ва Туркманистон етакчилари, Европа Иттифоқидан - Европа кенгаши Президенти Антониу Кошто ва Европа комиссияси Президенти  Урсула фон дер Ляйен иштирок этмоқдалар. Саммит Ўзбекистон-Европа ҳамкорлигини ривожлантиришда, айниқса, савдо-иқтисодий ва инвестициявий соҳаларда ҳамда инновациялар, “яшил” энергетика, рақамлаштириш ва қишлоқ хўжалиги каби асосий йўналишларда муҳим қадам ҳисобланади.

Европалик ҳамкорлар Ўзбекистоннинг иқтисодий ислоҳотлар соҳасидаги саъй-ҳаракатларини юқори баҳоладилар ва Янги Ўзбекистонни барпо этишга қаратилган сиёсатни қўллаб-қувватлашларини тасдиқладилар. Ушбу жараённинг Марказий Осиёда яхши қўшничилик ва ўзаро ишонч муносабатларини мустаҳкамлашни ҳам қамраб олиши мамлакатимиз аҳолиси томонидан фаол қўллаб-қувватланмоқда.

Музокаралар чоғида ўзаро ҳамкорликнинг туризм, маданият, таълим ва соғлиқни сақлаш каби муҳим йўналишлари ҳам муҳокама қилинди. Саммитда муҳокама қилинган кўпгина масалалар “Ижтимоий фикр” республика жамоатчилик фикрини ўрганиш Маркази томонидан ўтказилаётган жамоатчилик фикри сўровлари учун устувор йўналишлар ҳисобланади. Мамлакатимиз фуқаролари Европа билан, хусусан, иқтисодиёт ва таълим соҳаларидаги алоқаларни ривожлантиришга қаратилган ташаббусларни фаол қўллаб-қувватламоқдалар. Респондентлар кичик ва ўрта бизнесни ривожлантириш, хотин-қизлар ва ёшлар тадбиркорлигини қўллаб-қувватлаш каби лойиҳаларни, шунингдек, сув таъминоти ва чиқиндиларни қайта ишлаш соҳаларида давлат-хусусий шериклик асосида амалга оширилаётган лойиҳаларни ниҳоятда муҳим, деб ҳисоблайдилар. Сўровлар натижалари ўзбекистонликлар саммитда илгари сурилган ғояларни қўллаб-қувватлашини ва уларни халқимизнинг ҳаёт сифатини янада яхшилаш учун реал имконият сифатида кўришини тасдиқлайди. Мониторинг тартибида ўтказилаётган тадқиқотлар иштирокчилари некбинлик кайфиятини намоён этдилар ва барқарор ривожланиш ҳамда янги технологияларни жорий этиш истиқболларига ишонч билдиришди. Улар учун нафақат иқтисодий дастурлар, балки экологик ташаббуслар, рақамлаштириш ва янги иш ўринлари яратиш бўйича лойиҳалар ҳам муҳим аҳамият касб этади.

“Марказий Осиё – Европа Иттифоқи” саммитида Европа Иттифоқи билан ҳамкорликни ривожлантириш, аҳоли турмушини яхшилаш ва Ўзбекистон учун янги имкониятларни очиш мақсадида таклиф этилаётган ташаббуслар олий давлат тузилмаларидан тортиб, то оддий фуқароларгача бўлган барча даражаларда қўллаб-қувватланмоқда. Таъкидлаш жоизки, Ўзбекистоннинг жаҳон ҳамжамиятидаги ўрни ва роли ҳақида ўзбекистонликлар фикрининг таҳлили мамлакатимиз аҳолисининг ватанпарварлиги ва фуқаролик онги даражасининг юксаклигидан далолат беради. Жамоатчилик фикрини ўрганиш бўйича комплекс тадқиқотлар натижалари сўралган фуқароларнинг асосий кўпчилиги Ўзбекистоннинг жаҳон ҳамжамиятидаги ўрнини юқори баҳолашини кўрсатди. Сўровлар иштирокчилари Ўзбекистоннинг бой тарихий-маданий, адабий-маънавий ва илмий меросга эга мамлакат эканини таъкидлашмоқда, шунингдек, респондентлар Ўзбекистон жаҳон ҳамжамиятида фойдали қазилмалар ва ишлаб чиқарилувчи маҳсулотларга бой мамлакат сифатида идрок этилади, деб ҳисоблайдилар. Фуқаролар республиканинг меҳнат салоҳиятини юқори баҳоламоқдалар.

Респондентларнинг аксарияти Марказий Осиё минтақасида тинчлик ва барқарорликни сақлашда мамлакатимиз жуда муҳим ютуқларга эришаётгани ҳақида фикр билдирди. Фуқаролар давлатимиз Раҳбарининг барқарор тинчлик ва хавфсизликка эришиш, жумладан, минтақада давлатлараро мулоқотни мустаҳкамлаш, экстремизм ва терроризмга қарши курашиш бўйича қўшма чора-тадбирларни ривожлантириш, иқтисодий ҳамкорликни фаоллаштириш, чегарадаги мунозарали масалаларни тартибга солиш ва сув хавфсизлигини таъминлаш каби муҳим йўналишлардаги ташаббусларини юксак баҳоладилар. Сўров иштирокчиларининг фикрича, мамлакатимиз Президенти томонидан олиб борилаётган мутаносиб ва ​​конструктив ташқи ва ички сиёсат юртимиз ва минтақамизда тинчлик ва осойишталикни сақлашга, давлатимизни янада модернизация қилиш учун замин яратишга хизмат қилмоқда.

Социологик тадқиқотлар натижалари Ўзбекистоннинг барқарор ва изчил ривожланиши, биринчи навбатда, менталитети, маънавий қадриятлари, мафкураси бир-бирига яқин, маданий-тарихий мероси умумий бўлган қўшни мамлакатлар билан яхши қўшничилик муносабатлари ўрнатилган ва қўллаб-қувватланган тақдирдагина таъминланиши мумкинлигини тасдиқлайди.

Шуниси қувончлики, бу нуқтаи назарни Ўзбекистон, Марказий Осиё ва Европа Иттифоқи мамлакатлари етакчиларининг ҳам қўллаб-қувватлаши реал воқеаларда – “Марказий Осиё ва Европа Иттифоқи” биринчи саммитида ўз ифодасини топмоқда.

“Ижтимоий фикр” РЖФЎМ томонидан ўтказилган сўровлар натижалари Ўзбекистон жамиятида жамиятнинг ижтимоий инсонпарварлик моҳиятини ва унинг истиқболдаги изчил тараққиётини аҳолининг англаш тенденцияси барқарор эканлигидан далолат беради ва айни кунларда қадимий Самарқанд замини “Марказий Осиё - Европа Иттифоқи”нинг биринчи саммити каби йирик сиёсий воқеага мезбонлик қилаётгани бунинг энг яхши тасдиғидир.