ҚУРБОН ҲАЙИТИ — ИНСОН ҚАДРИ, МЕҲР-ОҚИБАТ ВА МИЛЛИЙ ҚАДРИЯТЛАР УЛУҒЛАНАДИГАН МУБОРАК АЙЁМ

“Ижтимоий фикр” Республика жамоатчилик фикрини ўрганиш маркази жамоаси юртимиз аҳли, қадрли ватандошларимиз ва барча мўмин-мусулмонларни улуғ ва муборак Қурбон ҳайити билан самимий муборакбод этади.

Қурбон ҳайити халқимизнинг асрлар давомида сайқалланиб келаётган миллий ва диний қадриятлари, меҳр-оқибат, инсонпарварлик, бағрикенглик ва саховат каби юксак фазилатларини ўзида мужассам этган муқаддас айёмдир. Ушбу байрам инсон қалбида шукроналик, эзгулик ва бир-бирига яхшилик қилиш каби олижаноб туйғуларни мустаҳкамлайди.

Мазкур қутлуғ кунларнинг маънавий аҳамияти шундаки, Қурбон ҳайити жамиятда инсон қадрини улуғлаш, аҳоли ўртасида ўзаро ҳурмат ва ҳамжиҳатлик муҳитини кучайтириш, кекса авлод ва эҳтиёжманд инсонларга эътиборни янада оширишга хизмат қилади. Айниқса, ўзбек халқининг азалий анъаналарида қўни-қўшничилик, қариндош-уруғчилик ришталари, беморлар ва муҳтожлар ҳолидан хабар олиш каби қадриятлар айнан шу муборак айёмда янада ёрқин намоён бўлади.

Жамоатчилик фикрини ўрганиш юзасидан ўтказилаётган ижтимоий тадқиқотлар натижалари ҳам фуқаролар ҳаётида миллий ва диний байрамларнинг ўрни тобора мустаҳкамланаётганини кўрсатмоқда. Фуқароларнинг катта қисми Қурбон ҳайитини оилавий бирдамлик, маънавий яқинлик, бағрикенглик ва савоб ишлар билан боғлиқ муқаддас қадрият сифатида баҳолайди.

Мамлакатимизда кейинги йилларда диний қадриятларга ҳурматни таъминлаш, аҳолининг ибодат ва байрамларни муносиб нишонлаши учун қулай шарт-шароитлар яратиш борасида амалга оширилаётган ислоҳотлар инсон манфаати ва қадрини таъминлашга қаратилгани билан аҳамиятлидир. Қурбон ҳайити муносабати билан белгиланган дам олиш кунлари ҳам юртдошларимиз учун оила даврасида бўлиш, яқинлар ҳолидан хабар олиш, зиёратлар амалга ошириш ва хайрли амалларни кўпайтириш учун муҳим имконият яратади.

Бугунги кунда жамият тараққиёти нафақат иқтисодий омиллар, балки инсонларнинг маънавий бирлиги, ўзаро ишончи ва ижтимоий ҳамжиҳатлиги билан ҳам чамбарчас боғлиқдир. Шу маънода Қурбон ҳайити юртимизда тинчлик ва барқарорлик муҳитини мустаҳкамлаш, меҳр-оқибат ва инсонпарварлик тамойилларини кенг қарор топтиришга хизмат қилаётган улуғ байрам сифатида алоҳида аҳамият касб этади.
Ушбу файзли ва баракали айём ҳар бир хонадонга қувонч, хотиржамлик, меҳр-оқибат ва фаровонлик олиб кирсин. Юртимизда доимо тинчлик, осойишталик, миллатлараро тотувлик ва эзгулик муҳити барқарор бўлсин.

Қурбон ҳайити муборак бўлсин азиз юртдошлар!
Ҳурмат билан “Ижтимоий фикр” республика
жамоатчилик фикрини ўрганиш маркази жамоаси!