Наврўз – бу баҳор ва янги ҳаётнинг рамзи бўлган қадимий байрам бўлиб, унинг тарихи бир неча минг йилларга бориб тақалади. У Зардуштийлик давридан бошлаб нишонлаб келинади ва ўзининг инсоният учун эзгулик, меҳр-мурувват ва табиатга ҳурмат каби қадриятларини ўзида мужассам этади.

Наврўз байрами меҳр-оқибат ва аҳилликка чорловчи анъаналарга бой бўлиб, унинг асосий мазмуни табиат уйғониши, янгиланиш ва инсонлар ўртасидаги бирдамлик ғояларига асосланган. Байрам муносабати билан халқ анъанавий тадбирлар, театрлаштирилган томошалар, халқ ўйинлари ва хайрия тадбирларини уюштириб, эзгу амалларни тарғиб этади. Юртимиз сарҳадлари бўйлаб ҳам Наврўз байрами кенг нишонланади.

“Ижтимоий Фикр“ республика жамоатчилик фикрини ўрганиш Маркази томонидан “Фуқаролар 2025 йилда наврўз умумхалқ байрамини ўтказиш ҳақида” мавзусида жамоатчилик фикрини ўрганиш учун социологик тадқиқот ўтказишни бошлади.

Мазкур социологик тадқиқот ўтказишдан мақсад юртдошларимизнинг Наврўз байрамига нисбатан жамоатчилик кайфияти ва муносабатининг динамикасини ўрганиш, байрамни ўтказишнинг замонавий ва анъанавий шаклларига бўлган ижтимоий талаб ва интилишларни таҳлил қилиш, фуқароларнинг Наврўз тадбирларини ташкил этишга оид фуқароларнинг муносабати, интилишлари ва хоҳишларини аниқлаш, миллий қадриятлар ва анъаналарига нисбатан муносабатларини фикр-мулоҳазаларини ўрганишга қаратилган.