ФУҚАРОЛАР ФУТБОЛ БЎЙИЧА ЎЗБЕКИСТОН МИЛЛИЙ ТЕРМА ЖАМОАСИНИНГ 2026 ЙИЛГИ ЖАҲОН ЧЕМПИОНАТИДАГИ ИШТИРОКИ ТЎҒРИСИДА

"Ижтимоий фикр" РЖФЎМ футбол бўйича Ўзбекистон миллий терма жамоасининг тарихий ютуғи - мамлакат тарихида илк бор 2026 йилда FIFA жаҳон чемпионатига чиқишига мамлакат фуқароларининг муносабатини ўрганиш мақсадида жамоатчилик фикри сўровини ўтказди. Сўровда мамлакатимизнинг турли минтақаларида истиқомат қилаётган ва турли соҳаларда банд бўлган барча ёшдаги фуқаролар, эркаклар ва аёллар, ёшлар ҳамда ўрта ва катта ёш вакиллари иштирок этди.

Тадқиқот натижалари мамлакатимиз миллий терма жамоасининг 2026 йилги футбол бўйича жаҳон чемпионатига чиқиши ҳақида ўзбекистонликларнинг хабардорлик даражаси юқори эканлигидан далолат беради. Фуқароларнинг хабардорлик даражаси 86,1%ни ташкил этгани ушбу спорт ютуғининг кенг жамоатчилик эътиборига сазовор бўлгани ва мамлакатнинг ахборот кун тартибида ғоят муҳим ўрин тутганидан даракдир.

Аниқланган хабардорлик даражаси футбол бўйича миллий терма жамоамизнинг 2026 йилги жаҳон чемпионатидаги иштироки спорт мавзуси доирасидан четга чиқиб, умуммиллий миқёсдаги воқеага айланганини тасдиқлайди. Ўзбекистонлик футболчиларнинг ютуғи ҳақидаги ахборот аҳолининг турли ижтимоий-демографик гуруҳлари орасида ёши, маълумот даражаси, машғулот тури ва яшаш минтақасидан қатъи назар кенг тарқалди.

Спортчиларимизнинг бундай юқори даражадаги халқаро турнирда иштирок этиши жамоатчиликда катта қизиқиш уйғотиб, оилалар, профессионал жамоалар, таълим муассасалари ва ижтимоий тармоқларда қизғин муҳокамаларга сабаб бўлмоқда.

Сўров давомида футбол бўйича мамлакатимиз терма жамоаси илк бор жаҳон чемпионатида иштирок этишининг аҳамияти аниқланди. Фуқароларнинг аксарият кўпчилиги - 93,2% миллий терма жамоамизнинг жаҳон чемпионатидаги иштирокини "жуда муҳим воқеа" деб ҳисоблайди ва мамлакатимиз футболчиларининг ютуқларини ижобий баҳолашди.

Сўров иштирокчилари мамлакатимиз спортчиларининг энг йирик халқаро футбол мусобақасидаги иштирокининг муҳимлигини эътироф этдилар, спорт ютуқлари эса фуқаролар томонидан миллий нуфузни мустаҳкамлаш ва мамлакатнинг халқаро нуфузини оширишда муҳим омил сифатида қаралмоқда. Шунингдек, таъкидлаш жоизки, воқеанинг муҳимлигини баҳолашнинг юқори даражаси унинг муҳимлиги тўғрисида шаклланган ижтимоий бирдамликни ва футбол бўйича миллий терма жамоанинг спорт ютуқларига аҳолининг ҳиссий ва ижтимоий-сиёсий жалб этилганлигининг юқори даражасини акс эттиради.

Сўров натижалари шуни кўрсатдики, жамоатчилик фикрида миллий терма жамоанинг футбол бўйича жаҳон чемпионатига чиқишига нисбатан ижобий ҳис-туйғулар устунлик қилмоқда. Фуқароларнинг ушбу воқеага нисбатан энг кенг тарқалган муносабати қувонч ҳиссига тўлиқ бўлди. Футболчиларимиз ва миллий терма жамоамизнинг ютуқлари фуқароларимизда ватанпарварлик ва мамлакат учун фахр-ифтихор туйғусининг ўсишига хизмат қилмоқда.

Тадқиқот иштирокчилари ўз жавобларида миллий бирдамлик туйғусини ҳис қилаётгани, шунингдек, футболга қизиқиши ва футболчилар ҳамда мураббийлар жамоасига ҳурмати ортиб бораётганини таъкидладилар.

Сўровда олинган натижалар шуни кўрсатдики, Ўзбекистон терма жамоасининг жаҳон чемпионатига чиқишини ҳиссий идрок этиш кўп қатламли хусусиятга эга бўлиб, у ҳам бевосита ижобий (қувонч, фахр-ифтихор) ҳис-туйғуларни, ҳамда жамоа ҳиссини мустаҳкамлаш ва спортга қизиқишни ошириш билан боғлиқ кенг қамровли ижтимоий таъсирларни мужассамлаштиради.

Сўров натижалари Ўзбекистон миллий терма жамоасининг футбол бўйича 2026 йилги жаҳон чемпионатидаги иштироки юзасидан жамоатчилик кутилмалари асосан вазмин ва реал характерга эга эканлигини кўрсатди. Фуқаролар ўз умидларини якуний натижадан қатъи назар, сифатли ва мазмунли ўйиннинг намойиши билан боғлашмоқда. Сўров иштирокчиларининг фикрича, футболчиларимизнинг асосий вазифаси жаҳон чемпионатида Ўзбекистон шарафини муносиб ҳимоя қилишдан иборат бўлиб, бу саралаш босқичидан муваффақиятли ўтгандан сўнг миллий терма жамоамиз имкониятларига бўлган ишончнинг ортиб бораётганидан далолат беради.

Жамоатчилик фикрида жаҳон чемпионатида муносиб иштирок этиш, сифатли футбол ўйинини намойиш қилиш ва мамлакатнинг халқаро нуфузини мустаҳкамлашга бўлган интилиш устунлик қилмоқда, турнирдан фақат юқори натижаларни кутиш эса иккинчи даражали ўринни эгаллади. Жамоатчилик фикрида футбол бўйича жаҳон чемпионатида Ўзбекистон миллий терма жамоаси иштирокининг ўзини ва мусобақаларнинг якуний натижасидан қатъи назар, миллий терма жамоани қўллаб-қувватлашнинг тарихий аҳамиятини англаш шаклланган.

Ўзбекистон терма жамоасининг жаҳон чемпионатига чиқишига Ўзбекистон Республикаси Президенти Шавкат Мирзиёев томонидан бутун мамлакатимиз халқи учун тарихий воқеа сифатида таъриф берилди. Давлатимиз раҳбари ўзбекистонлик мухлислар бу ютуқни узоқ 34 йил кутганини, терма жамоа футболчилари эса ҳар бир ўйинда юксак профессионал маҳорат, масъулият ва ватанпарварлик ҳисси, ғалабага интилишини намоён этиб, мамлакатимиз футболи тарихида янги саҳифа очганини таъкидлади.

Президентнинг сўзларига кўра, миллий терма жамоанинг жаҳон чемпионатига чиқиши нафақат спорт соҳасида, балки бутун жамият ҳаётида сезиларли кўтаринкиликка сабаб бўлди. Футболчилар ёшлар учун намунага айланди, спорт машғулотлари билан шуғулланишга қизиқиш ортди, терма жамоанинг тарихий натижаси эса жамиятнинг турли қатламлари учун илҳом манбаи бўлди.

Миллий терма жамоа футболчилари ва мураббийлар штаби билан учрашувда давлатимиз раҳбари сўнгги йилларда мамлакатимизда спорт ва футболни ривожлантириш борасида амалга оширилаётган кенг кўламли ишлар туфайли ушбу натижага эришилганини алоҳида таъкидлади. Оммавий футболни янада ривожлантириш муҳимлиги таъкидланиб, болалар ва ёшларни спорт билан мунтазам шуғулланишга жалб қилиш, соғлом турмуш тарзи, интизом ва ватанпарварликни шакллантиришга қаратилган "Ҳар бир маҳалла - футбол майдони" ташаббуси илгари сурилди.

Тадқиқот натижаларининг таҳлили шуни кўрсатдики, жамоатчилик фикрида Ўзбекистон миллий терма жамоасининг футбол бўйича 2026 йилги жаҳон чемпионатидаги иштироки жамият ҳаётининг турли соҳаларига ижобий таъсир кўрсатишга қодир воқеа сифатида идрок этилмоқда. Энг оммалашган фикрга кўра, спортчиларимизнинг футбол бўйича 2026 йилги жаҳон чемпионатидаги иштироки мамлакатнинг халқаро нуфузи ва таниқлигини оширишга хизмат қилади.

Ижтимоий кутилмалар таркибида ушбу воқеанинг ёшларга ва оммавий спортни ривожлантиришга таъсири муҳим ўрин тутади, сўров иштирокчилари миллий терма жамоанинг жаҳон чемпионатидаги иштироки ёшларнинг спортга бўлган қизиқишини оширишга ёрдам беради, деган фикрни билдирдилар. Жамиятда жамоанинг жаҳон биринчилигига чиқиши Ўзбекистоннинг халқаро майдондаги имижига ижобий таъсир кўрсатади, деган фикр ҳам кенг тарқалган. Шунингдек, сўров иштирокчилари футболчиларимизнинг муваффақияти миллий ғурур ва бирдамлик туйғусини кучайтиришини, спорт инфратузилмасини янада ривожлантириш истиқболлари ва минтақаларда футболни ривожлантириш учун қўшимча рағбат бўлишини ҳамда инвестор ва ҳомийларнинг спорт соҳасига қизиқиши ортишига хизмат қилишини таъкидлашди.

Жавоблар тақсимотининг таҳлили шуни кўрсатдики, ўзбек футболини янада ривожлантириш жамоатчилик онгида, биринчи навбатда, минтақаларда қўшимча футбол майдончаларини қуриш, мамлакатнинг барча минтақаларида иқтидорли футболчиларни излаш ва саралашнинг самарали тизимини яратиш, болалар мураббийларини тайёрлашни кучайтириш зарурати, жойларда спорт билан шуғулланиш имкониятларини кенгайтириш, истиқболли спортчиларни аниқлаш механизмларини такомиллаштириш ва ёш футболчиларни спортчи сифатида шаклланишининг дастлабки босқичларида тайёрлаш сифатини ошириш билан боғланмоқда.

Шунингдек, фуқаролар мактаб ўқувчилари ва талабалар футболини ривожлантириш, мактаб ўқувчилари ва талабалар футбол лигаларини ташкил этиш, ёш футболчиларнинг хорижда малака ошириш амалиётини кенгайтириш ва футбол академиялари фаолиятини такомиллаштиришни қўллаб-қувватлашди.

Респондентлар, шунингдек, футбол соҳасини бошқаришнинг шаффофлигини оширишга эътибор қаратдилар, аёллар ва оммавий футболни қўллаб-қувватлаш, спорт фанини ривожлантириш ва миллий чемпионат сифатини ошириш тарафдори бўлишди.

Аксарият фуқаролар эришилган натижани Ўзбекистон Республикаси Президентининг спорт ва футболни ривожлантиришга қаратаётган эътибори ва қўллаб-қувватлаши, шунингдек, ушбу соҳадаги изчил давлат сиёсати билан боғлади. Сўровда қатнашган респондентлар футболчилар ва мураббийларнинг профессионаллигини муваффақиятнинг муҳим омили деб ҳисоблайдилар, бу эса миллий футболни ривожлантириш бўйича олиб борилаётган ишларнинг юқори баҳоланишидан далолат беради.

Ўзбекистоннинг жаҳон чемпионатидаги иштироки фуқаролар томонидан мамлакатнинг халқаро нуфузини ошириш, ёшлар ўртасида спортни оммалаштириш ва футболни янада ривожлантиришнинг муҳим омили сифатида баҳоланмоқда. Шу билан бирга, фуқаролар миллий футболнинг келгуси ютуқларини инфратузилмани такомиллаштириш, малакали кадрлар тайёрлаш, иқтидорли спортчиларни аниқлаш ва қўллаб-қувватлашнинг самарали тизимини яратиш билан боғламоқдалар.